Pritjes për ardhjen e afganëve i ka ardhur fundi. Kur akrepat shënuan 03:20 të mëngjesit të së premtes, 121 afganët e parë, mes të cilëve 11 foshnja prekën tokën shqiptare për një jetë më të sigurtë dhe larg luftës. Afganët fillimisht i janë nënshtruar përpunimit të të dhënave individuale, regjistrimit dhe më pas ekzaminimeve mjekësore në çadrat e ngritura në Rinas posaçërisht për ta.
Avioni i tyre ka bërë fillimisht një ndalesë në kryeqytetin e Gjeorgjisë, Tbilisi, prej nga është nisur më pas rreth mesnatës drejt Tiranës. Pas ardhjes në Tiranë, me autobus i janë drejtuar hotelerive në Durrës, ku do të strehohen dhe qëndrojnë për aq sa është e nevojshme, ndërsa afganët e tjerë që do të vijnë në ditët në vijim, do të strehohen për pak ditë në konviktet e Qytetit Studenti.
Ata u pritën në aeroport nga ambasadorja e SHBA-së, Yuri Kim, dhe ministrja e Jashtme Olta Xhaçka, që është njëkohësisht edhe drejtuesja e Task-Forcës që do të merret me menaxhimin dhe koordinimin për akomodimin e afganëve.
Sipas kreut të qeverisë, në listën e afganëve ka gazetarë, kineastë, edukatorë, madje dhe yje të njohur të kinemasë. Ambasadorja amerikane, Yuri Kim, ishte e pranishme në orët e para të mëngjesit në aeroportin e Rinasit, për të pritur grupin e 120 afganëve që mbërritën në vendin tonë.
Ambasadorja Kim thekson se populli shqiptar edhe njëherë u ofron mikpritje dhe mbrojtje atyre në nevojë të madhe, e shton se SHBA-të janë krenare që kanë Shqipërinë vend mik dhe aleat.
“Ministrja Olta Xhaçka dhe unë mirëpritëm grupin e parë të afganëve që kërkonin strehim të përkohshëm në Shqipëri. Siç kanë bërë gjithmonë, populli i Shqipërisë edhe një herë u ofron mikpritje dhe mbrojtje atyre në nevojë më të madhe. Ne jemi krenarë t’ju quajmë një mik dhe aleat. Faleminderit”, shkruam Yuri Kim në Twitter.
