E ndërsa ka kaluar një javë nga ngjarja e rëndë që tronditi Dibrën e Madhe, ku u vra familja Pocesta, mediat maqedonase dhe ato italiane kanë publikuar detaje lidhur me krimin e rëndë.
Tre anëtarë të një familje u gjetën të vdekur nga të afërmit e tyre në dhomat e gjumit. Viktimat janë Amit Pocesta 54- vjeç, bashkëshortja e tij Nazmije Pocesta 53-vjeçare dhe vajza e tyre Anila Pocesta 14- vjeçare.
Në fillim mediat maqedonase raportuan se autori i vrasjeve ishte burri i motrës (kunati) i Amit Pocestës, Rasim Findo, për shkak të një konflikti për pronën, për rrugicën që lidh dy banesat. Ai njihej si person konfliktual. Por vetë Rasimi dhe djali i tij Amir Findo kanë mohuar akuzat.
Ndërsa sipas portalit “Zhurnal.mk”, familja e ekzekutuar në Dibër të Madhe, është vrarë nga vajza e madhe e familjes.
Vajza e madhe Blerta Pocesta 28-vjeç identiteti i të cilës është bërë publik nga mediat italiane, thuhet se fillimisht ka kryer vrasjet makabre dhe më pas ka udhëtuar drejt Italisë. Ajo është kthyer sërish pasi “ka marrë lajmin” për vrasjen e familjes së saj.
Sipas burimeve jozyrtare për Zhurnal, ajo është ndihmuar në kryerjen e krimit edhe nga dy persona të tjerë, njëri nga qyteti i Gostivarit dhe tjetri nga Dibra, të cilët ndodhen në paraburgim së bashku me vajzën.
Por hetimi për këtë krim të rënë është shtrirë deri në Itali, dhe mediat atje bëjnë të ditur se shtëpia e familjes shqiptare në Itali është sekuestruar nga policia, ku kanë bërë kontrolle intensive.
Agjentët e skuadrës Flying të Padovës, sipas mediave italiane thuhet se kishin bërë kontrolle të mëdha në shtëpinë e familjes shqiptare në Cornadella e Sacile.
Në fund të inspektimit dhe kontrolleve që kryesisht kishin të bënin me pajisjet kompjuterike, u urdhërua sekuestrimi i shtëpisë së familjes Pocesta.
https://tiranatoday.com/akuzohet-se-ekzekutoi-familjen-shqiptare-ne-gjume-dhendri-thyen-heshtjen-flet-edhe-nipi/
Hetimet ndërkohë vazhdojnë dhe mendohet se krimi mund të jetë orkestruar nga Italia. Policia e Shtetit është deleguar për të mbledhur elemente të dobishme për hetimet – të kryera në bashkëpunim me autoritetet maqedonase./TIRANA TODAY/
