Ministrja e Shëndetësisë, Ogerta Manastirliu ka informuar qytetarët në lidhje me gjendjen e masave mbrojtëse për koronavirusin në vend.
Gjatë fjalës së saj në mbledhjen e task-forcës, Manastirliu tha se spitalet janë të furnizuara me masat e duhura, përfshirë edhe maskat mbrojtëse. Sipas ministres, sa i përket maskave tregu ka mjaftueshëm stok për të përballuar kërkesën.
“Përgjigja do të përmbush pritshmëritë tuaja. Ashtu si ekspertët rekomandojmë maskat nuk parandalojnë virusin. Vendosen tek ata persona që kanë probleme më shëndetin ose i shërbejnë dikujt që është i sëmurë. Kemi bërë një verifikim të importeve të maskave. Ekzistojnë dhe kompanitë që janë distributor. Spitalet disponojnë të gjitha masat mbrojtëse duke nisur nga maskat. Ndërsa farmacitë janë private dhe porosisin sipas kërkesë. Tregu ka stokun e mjaftueshëm që të përballojë kërkesën. Spitalet kanë marrë të gjitha masat për furnizimin e tyre. Kështu që pa asnjë lloj shqetësimi”, tha ajo.
E pranishme në këtë mbledhje është edhe drejtoresha e Institutit të Shëndetit Publik, Albina Fico. Ajo siguroi se në laboratorët e ISHP janë të mjaftueshme kitet dhe ragentët për të kryer analizën e koronavirusit.
“Kemi numrin e duhur të kiteve dhe të ragentëve për të bërë analizat në laboratorët e ISHP-së. Risku për Shqipërinë është i ulët. Fakti që është në Itali, nuk e ndryshon nivelin e riskut brenda në Shqipëri. Alerti është parapërgatitje e mirëmenduar nëse do të kemi disa zhvillime të reja. Ne vijojmë të kemi risk të ulët, nuk kemi rast të konfirmuar”, tha drejtoresha e ISHP-së.
