Nga 1 korriku do të rriten pagat për mjekët dhe infermierët. Kjo është pohuar nga Ministrja e Shëndetësisë, Ogerta Manastirliu, gjatë fjalës së saj në nisje të Kongresit të PS-së. Manastirliu tha se deri në fund të këtij mandati qeverisës, do të rriten rrogat e mjekëve dhe infermierëve deri në masën 40%.
“Aseti ynë më i çmuar janë mjekët dhe infermierët tanë, për të cilët investimet nuk kanë ndalur, qoftë në investimin e kushteve të punës, qoftë edhe në premtimin e mbajtur në dy mandatet e vështira. 63 % janë rritur pagat për mjekët dhe infermierët. Do vijojmë t’i rrisim pakat për mjekët dhe infermierët edhe këtë vit, duke filluar nga 1 korriku. Edhe pse po përballemi me vështirësi, ne do ta çojmë deri në fund zotimin tonë. Deri në fund të mandatit, pagat për mjekët dhe infermierët do rritem me 40% dhe nuk do ndalemi këtu, sepse autonomia spitalore si një model i ri për menaxhimin dhe financimin spitalor në vend do mundësojë që stafet tona ta paguhen sipas performances. Por nga ana tjetër, ajo që na intereson është shërbimi ndaj njerëzve, dhe ne duam që të eliminojmë çdo praktikë abuzive dhe korruptive në sistemin spitalor. Dhe autonomia spitalore do ndikojë në eliminimin e çdo abuzimi. Por thënë kjo nuk kemi përfunduar, kemi shumë për të bërë”.
