Ish-deputeti i LSI-së, Endrit Brahimllari i ftuar në emisionin “45 Minuta”, deklaroi se në 16 mars, datë në të cilën opozita e bashkuar do të zhvillojë protestën e saj para godinës së Kryeministrisë, do të fillojnë përgatitjet për një qeveri tranzitore.
Ndër të tjera, ai është shprehur se brenda PS ka socialistë të ndershëm, por mjafton vetëm që të ikë Rama.
I pyetur nëse Pandeli Majko, do të ishte njëri nga emrat që do të pranohej për të drejtuar këtë qeveri nëse arrihet dakordësimi politik, Brahimllari është përgjigjur se “Unë kam thënë në një emision që duhet një kryeministër tjetër jo Rama, u artikulua emri i Majkos dhe thashë se është 100 herë më i mirë se nuk është i lidhur me krimin. Por Ballën, jo, ai është i lidhur si Rama“.
Pas Lefter Kokës, që doli kundër vendimit të grupit duke pranuar mandatin dhe u përjashtua, Brahimllari thotë se fatin e tij e kanë pësuar edhe këshilltarët në bashkinë e Durrësit që bashkuan votat me socialistët në Këshillin Bashkiak duke votuar disa projektvendime.
“LSI ka një vendim zyrtar, në datë 22 mos gaboj ka qenë mbledhja e Komitetit Drejtues ku vendosi, që cilido që thyen vendimin politik është i çregjistruar si anëtar partie. Koka nuk është deputet i LSI-së. Unë kam komunikuar në momentin që ka qenë deputet, mbi aktivitetit e LSI. Ka thyer vendimin e grupit, çfarë shkaqesh doni më? Këshilltarët e Durrësit? Jam vendosur në dijeni, cilido që thyen vendimin politik të LSI-së dhe nuk është në interesa të qytetarëve nuk përfaqëson vullnetin e LSI-së, kjo është e njëjtë si për deputetët dhe për këshilltarët. Ky është vendimi politik i LSI-së“.
