Analisti Fatos Lubonja e sheh tepër të zymtë zhvillimin e vendit me qeverisjen e re që do të nisë punë në muajin shtator. Ai shpjegon se sistemi politik që funksionon aktualisht duhet të zhbëhet pasi përbën një kërcënim serioz për mirëqenien e qytetarëve shqiptarë.
Duke analizuar kabinetin e ri qeveritar “Rama 2” emrat e të cilit pritet të bëhen publike këtë fundjavë dhe në shtator do të formalizohen në postet në përkatëse, Lubonja vë në dukje se qeveria e re nuk ka asnjë vizion për zhvillimin e vendit.
“Është vështirë të bëhet parashikim se ky kryeministri i ka bërë gjerat që të bëhet i paparashikueshëm. Ky po bën një fushatë të dytë tani. Ai duhet të merrej me projekte tani. Jemi përballë situatash të papritura. Nuk e dimë çfarë do ndodhë. Është një situate që ka nevojë për reflektim nga të gjitha forcat politike, pasi është një situatë krize. Nuk e di çfarë do ndodhë, por nuk jam optimist. Nuk jam optimist për gjithë spektrin politik, pasi ka ardhur koha t’i jepet fund një politike totalitariste. Ky sistem duhet të rishikohet. Pra sistemi i tepsisë ka nevojë të riformatohet”- tha Lubonja për “News 24”
Por cili është roli i opozitës në këtë situatë, kur premisat për një qeverisje sa të mirë të vendit janë shumë të vogla, Lubonja shprehet se PD dhe LSI duhet të shkëputen nga oligarkët e tyre dhe të përfaqësojnë shtresat në nevojë. Ndryshe do të përfundojnë duke i dhënë më shumë pushtet Edi Ramës, i cili sipas Lubonjës po bëhet gjithnjë e më shumë një rrezik për vendin.
“PD duhet të rikthehet dhe të marrë dimensione më sociale. Unë mendoj se PD dhe LSI duhet të dalin nga sistemi dhe të godasin sistemin. Se mendojnë se do vijne ata më pas. Pra të shkëputen nga oligarkët. Opozita duhet të ndryshojë qasje dhe të bindë popullin se është vërtet me ata. Me këtë lloj opozite rreziku më i madh është vetë Edi Rama”- tha Lubonja.
