Analisti Fatos Lubonja ka kritikuar ashpër kryeministrin Rama, i cili së fundmi është shfaqur në mediat italiane ku është intervistuar lidhur me situatën politike.
Në një lidhje telefonike me News 24, Lubonja shprehet se nuk është parë ndonjëherë që kryeministri të shkojë jashtë dhe bëjë fushatë, ndërsa nuk ka kursyer kritikat as ndaj Pirgut, i cili deklaroi se do i duhet të japë disa shfaqje për të rregulluar imazhin e Shqipërisë pas tensioneve në protesta.
“Keni parë të shkojë kryeministri të bëjë fushatë jashtë? Askush s’e bën këtë. Se doli ai Pirgu dhe tha që u dashka të japë disa shfaqje për të rregulluar imazhin e Shqipërisë. Këta janë fyerje për inteligjencën e shqiptarëve, kemi parë ça ndodh në Greqi, jo një gomë po janë djegur pafund. Edhe s’kanë dalë artistët t’i kritikojnë, përkundrazi i kanë mbështetur.
Po këta janë disa palaço që kaq meriton t’u thuash”, tha ndër të tjera Lubonja.
Më tej, ai shtoi se duhen protesta më të mëdha, pasi Rama nuk njeh demokraci dhe as dialog, por vetëm frikë:
“Duhen protesta dhe më të mëdhaja dhe më të fuqishme dhe natyra e këtij politikani e ka provuar se nuk njeh autokritikën, nuk e njeh dialogun por e përdor si formë mashtrimi, nuk njeh korrigjimin. Ky lloj politikani është nga ata që nuk njeh demokracinë, ai nuk njeh ndonjë instrument tjetër përveç frikës.”/ Tirana Today
