Pak orë pasi LSI përmes deputetit te saj Endrit Braimllari nxori dokumentet që tregonin se Drejtori i Përgjithshëm i Bordit të Kullimit për rajonin Korçë, Elbasan, Berat, është je person i dënuar më parë nga Gjykata, ministri i Bujqësisë Niko Peleshi e shkarkon.
“Asnjë lëkundje në mbrojtjen e pastërtisë së figurës. Falënderim çdokujt që hedh dritë mbi fakte të kësaj natyre”, tha Peleshi.
“Duke marrë në konsideratë faktin e bërë publik, se drejtori i Drejtorisë së Ujitjes dhe Kullimit për rajonin Korcë-Elbasan-Berat, rezulton fajtor me një vendim të formës së prerë (fakt për të cilin nuk është marrë dijeni në momentin e emërimit të tij) Ministri i Bujqësisë dhe Zhvillimit Rural, Niko Peleshi, vendosi largimin e tij të menjëhershëm nga detyra.
Qeveria e Shqipërisë s’ka pasur, s’ka dhe s’do të ketë asnjë lëkundje në mbrojtjen e pastertisë së figurës, së çdo zyrtari në varësinë e pushtetit ekzekutiv. Ministria e Bujqësisë dhe Zhvillimit Rural, falenderon dhe inkurajon çdokënd që hedh dritë mbi fakte të kësaj natyre, në funksion të moscënimit të figurës së zyrtarit të shtetit nga asnjë hije e të shkuarës në raport me ligjin”, thuhet në njoftim.
LSI publikoi dënimin e Nexhip Merrollit me 6 muaj burg për falsifikim.
Postimi i Braimllarit
Edi Rama emëron Drejtorin e Përgjithshëm të Bordit të Kullimit për rajonin Korçë, Elbasan, Berat shtetasin e dënuar me vendim të formës së prerë nga Gjykata e Rrethit Gjyqësor Korçë, Nexhip Merolli. Kryeministri i Drogës riciklon të dënuarit në poste kyçe në administratën publike. Bashkëngjitur gjeni vendimin e Gjykatës dhe urdhërin e emërimit. Kjo është Rilindja e paligjshmërisë!
