Kreu i Vetëvendosjes, Albin Kurti ka bërë me dije se nuk mund të takohet as këtë herë me presidentin e Kosovës, Hashim Thaçi.
Kurti i ka dërguar një letër presidentit Thaçi duke e falenderuar për të dyja ftesat, teksa e njofton se ndodhet jashtë vendit.
Lideri i LVV-së e ka shpërndarë letrën edhe në faqen e partisë së tij në Facebook. Përmes kësaj letre ai kritikon Thaçin se të dyja ftesat e tij ia kishte dërguar më parë portaleve sesa atij.
“I nderuar President i Republikës së Kosovës. Ju faleminderit për dy ftesat që të takohemi sot, ftesa që këto fillimisht publikohen nëpër portale dhe më pas mbërrinin në zyrën tonë. Sot isha jashtë vendit. Nuk mund të vij as sonte. Për t’u konsultuar për caktimin e mandatarit për formimin e Qeverisë, takohemi gjatë ditëve në vijim. Ndërkohë po i shqyrtoj këto nenet që i kemi përmendur në dy letrat tuaja”, shkruhet në letrën e dërguar.
Thaçi e ka ftuar sot dy herë kryetarin e Lëvizjes Vetëvendosje, Albin Kurti, për të caktuar mandatarin për formimin e Qeverisë. Takimi ishte paraparë të mbahej në orën 13:30 në kabinetin e Presidentit të Kosovës.
