Kryetari i Bashkisë së Vlorës, Dritan Leli, si rrallë herë i ka dalë në mbrojtje kryeministrit Rama, lidhur me çështjen e muzikës. Shumë biznesmenë dolën në protestë dje dhe sot në Vlorë, madje mbyllën dhe lokalet.
I menjëhershëm ishte reagimi i kreut të qeverisë, i cili zbuloi se që nga nesër, muzika do të ndalet në 23:00, në çdo zonë turistike të banuar. Leli tha se si bizneset ashtu edhe policia duhet të jenë në respekt të ligjit, ndërsa kërkoi mirëkuptimin e pronarëve të lokaleve në uljen e muzikës, që sipas tij, në shumë raste krijon probleme për turistët. Pas protestës së bizneseve në Lungomare, Komiteti Teknik i Ekspertëve pritet të dalë në një konferencë për media rreth orës 15:00, për të sqaruar nëse do të lehtësohen masat.
Pavarësisht faktit se muzika do të ndalet në 23:00 në çdo zonë turistike të banuar, ky orar nuk ka qenë aspak i përshtatshëm për pronarët e bizneseve në Lungomare, të cilët kanë pezulluar aktivitetin e tyre për 24 orët e ardhshme. Ata kërkojnë që orari i muzikës të shtyhet deri në 00:00, por kërkesa e tyre është refuzuar nga ana e kryeministrit Edi Rama.
