“Unë do jap dorëheqjen nëse në 30 qershor do të zhvillohen zgjedhje”. Kjo ishte deklarata e bujshme e shprehur publikisht para 30 qershorit nga ana e deputetit Lefter Maliqi. Tashmë që zgjedhjet u mbajtën dhe ai nuk e ka lënë mandatin, moderatorja Eni Vasili ia solli në kujtesë deklaratën e dy javëve më parë.
I zënë ngushtë nga pyetja, Maliqi u shmang duke thënë se ai nuk e la mandatin ngaqë Meta nxori një dekret të ri për zgjedhjet. Sipas tij, konfliktin e shmangu presidenti, dhe se nuk ia plotëson dëshirën atë që e cilëson si kryeministrin më arrogant.
Biseda
Vasili: Z. Maliqi, ju deklaruat se nëse në 30 qershor bëhen zgjedhje, do jepnit dorëheqjen?
Maliqi: E prisja këtë pyetje. Nuk ka asgjë për të qeshur.
Vasili: Për ju, po.
Maliqi: Unë kam thënë që në 30 qershor, nëse presidenti nuk do nxirrte dekretin për shtyrjen e zgjedhjeve, nuk do kishte fuqi Basha dhe askush të ndalonte konfliktin civil.
Vasili: Përgjigjuni pyetjes që ju bëra.
Maliqi: Po patjetër, e para konfliktin e shmangu presidenti dhe e dyta nuk ia plotësoj këtë dëshirë kryeministrit më arrogant.
Vasili: Po ju nuk ju tha Rama, e thatë vete.
Maliqi: Do ta bëj këtë vetëm kur të bëhen zgjedhjet, dhe të fitoj Beratin 4 me 3. Unë do ta kisha dhënë dorëheqjen nëse presidenti nuk do kishte nxjerr dekretin.
Më pas Maliqi ka debatuar ashpër me zv/ministrin e Mbrojtjes, Petro Koçi, të cilit i tha se është sot në qeveri vetëm falë koalicionit me LSI në 2013.
“Qepe ti dhe hiqi ato syze. Ti je në qeveri vetëm falë Ilir Metës dhe pazarit të 2013”, iu drejtua Maliqi-Koçit.
Drejtuesja e emisionit e futi sërish në linjë Maliqin, i cili i tha se ajo po e drejtonte keq emisionin, duke i kujtuar një detyrë që ajo ka marrë së fundmi në administratë.
“Ti po e drejton keq emisionin. Ta gëzosh detyrën që të ka dhënë Edi Rama”, tha Maliqi, ndërsa Vasili iu përgjigj: “Po na jep dhe mend tani. Hajd mirupafshim!”, tha gazetarja, duke e mbyllur lidhjen direkte me deputetin.
Gazetarja Eni Vasili është zgjedhur së fundmi nga Parlamenti me propozim të qeverisë, si anëtare e Këshillit të Statistikave si përfaqësuese e medias.
