Ditën e djeshme parlamenti holandez votoi pro pezullimit të lëvizjes së lirë pa viza për shtetasit shqiptarë. Shkak për këtë vendim të parlamentit holandez është bërë kriminaliteti i shtuar i shqiptarëve atje. Pas këtij votimi qeveria e Holandës ka të drejtë t’i drejtohet Brukselit, pasi vendimin përfundimtar në lidhje me rikthimin apo jo të vizave do ta japë Bashkimi Evropian. Për shumë nga qytetarët ky është një vendim i drejtë, edhe pse është në dëm të Shqipërisë. Ata thonë për Tirana Today se në pjesën më të madhe të rasteve kanë qenë vetë shqiptarët fajtorë, pasi kanë thyer rregullat e zonës “Shengen”.
“Është një vendim i keq, por i drejtë. Sepse kriminelit kur i krijon kushte, sigurisht që ai do të vazhdojë i lirë aktivitetin e tij dhe bën çfarë të dojë. Është hap shumë mbrapa, por ky është i fundit. Kemi bërë shumë hapa të tjerë pas.”
“Është më mirë të kthehen sërish vizat. Le të vriten atje nëpër ambasada, të ngordhin shqiptarët. Sepse janë kunguj nga trutë të gjithë, nuk i keni parë si shkojnë budallenjtë nëpër protesta. Unë sigurisht nuk do të isha i lumtur të shkoja nëpër ambasada për një vizë, bëj shaka. Por, ne në Bashkimin Evropian nuk na fut njeri.”
“Atë punë ka Holanda, po të sillen mirë shqiptarët asgjë nuk do të ndodhë. Normal, ne dihet që shkelim rregullat. Dhe pasojat do të jenë penalitetet. Por, unë nuk mendoj se kjo gjë do të ndodhë. Pavarësisht Holandës, Evropa është e madhe, e ka zemrën më të madhe se veç një shtet.”
Një i ri tregon për Tirana Today se shumë herë ata janë të detyruar t’i shkelin rregullat e shteteve evropiane, pasi kërkojnë një jetë më të mirë. Kjo pasi Shqipëria nuk i ofron asnjë mundësi dhe ndonjëherë janë të detyruar të bëjnë punë që i sjellin fitime të mira. Edhe nëse kjo do të thotë të merren me drogë.
“Në Holandë nuk besoj se do të shkoj ndonjëherë, sepse nuk më duket një vend prej të cilit mund të përfitoj. Këtu në Shqipëri ne të rinjtë nuk kemi variante për të punuar. Ndaj do të kërkojmë diku për një jetë më të mirë, sepse ndoshta nuk kemi rrugë tjetër për të jetuar. Nëse andej merrem me një punë që paguhem më mirë, pse mos ta bëj. Të gjithë shqiptarët e dinë që të merresh me drogë paguhesh më mirë.”
Propozimi i Holandës është komentuar nga gjitha palët e politikës në vend, duke shkaktuar debate të brendshme. Opozita e lidh këtë vendim drejtpërdrejtë me qeverisjen e dështuar sipas tyre të kryeministrit Rama.
Kryetarja e Lëvizjes Socialiste për Integrim, Monika Kryemadhi në një deklaratë për mediat tha se kjo është një vulë e vendosur nga Holanda për lidhjen e shtetit me krimin. Për qytetarët faj nuk ka vetëm qeveria, por gjithë politikanët të cilët sipas tyre, nuk janë kujdesur asnjëherë për Shqipërinë.
“Shteti i ka të gjitha fajet, a është dënuar ndonjë politikanë? Kurse shqiptarët nuk kanë asnjë faj. Sepse kur nuk ka shtet këtu, normal që do të ikin pasi nuk do të vdesin për bukë.”
“Nuk kemi përse t’i japim asnjë faj botës. Gjithë fajet ne na i ka Shqipëria, mjerë ai që është me Edi Ramën, Ruçin e shokët e tyre. Vizat vërtetë u hoqën në kohën e Berishës, por Berisha na solli edhe çobanët e bagëtive të Bajram Currit për të na bërë ligjin. Këta nuk janë politikanë, por janë kusarë.”
“Evropa gjithmonë ka luajtur me Shqipërinë e na ka copëtuar. Është 100% tallje e shtetit tonë në radhë të parë me ne dhe pastaj e shtetit holandez me këtë popull. Kështu që i zoti i shtëpisë, e mban vetë shtëpinë e tij në këmbë.”/ TIRANA TODAY
