Editorial - Opinione

Largimi i Bolton dëshmon se Donald Trump, po qeveris pa asnjë strategji

               Publikuar në : 13:53 - 11/09/19 S.N

Nga Chris Cillizza “CNN”

Mëngjesin e të martës, Shtëpia e Bardhë njoftoi se Sekretari i Thesarit Stiv Mnakin, Sekretari i Shtetit Majk Pompeo dhe këshilltari i sigurisë kombëtare Xhon Bolton, do të mbanin një konferencë për mediat pasdite. Nëntëdhjetë minuta para se të caktohej ora e daljes për mediat, presidenti Donald Trump njoftoi shkarkimin e Boltonit.

“Unë e njoftova Xhon Boltonin mbrëmë, se shërbimet e tij nuk janë më të nevojshme në Shtëpinë e Bardhë. Unë nuk isha dakord me shumë nga sugjerimet e tij, ashtu si edhe të tjerët në administrate, dhe për këtë arsye i kërkova Xhonit dorëheqjen e tij, të cilën ma dorëzoi këtë mëngjes”- shkroi në Tuiter presidenti Trump, që shtoi se javën e ardhshme do të emërojë një këshilltari të ri për sigurinë kombëtare.

Dhe ky njoftim erdhi edhe më pak se 24 orë, pasi ai shkroi:”Medias së pabesueshme, i pëlqen të krijojë imazhin e kaosit në Shtëpinë e Bardhë, kur nuk ka asgjë të tillë”. Dhe gazetari i CNN, Xhim Akosta raportoi se zyrtarët e sigurisë kombëtare dhe stafi i Shtëpisë së Bardhë, e mësuan shkarkimin e Boltonit në të njëjtën kohë me gjithë të tjerët, kur Trumpi shkroi në Twitter.

Dhe sigurisht, që s’kishte si të ndodhte ndryshe! Shkarkimi i Boltonit, është thjesht shembulli i fundit i natyrës krejtësisht të paqartë të presidencës Trump. Ajo nuk ka një strategji afatgjatë. Asnjë planifikim. Aty është vetëm Donald Trump, që prodhon vazhdimisht shou, nga mëngjesi në darkë. Nëse shkarkimi i Boltonit, nuk ishte një gjë tjetër përveç një tjetër lëvizje impulsive nga ana e Trump, pse do ta përfshinte Shtëpia e Bardhë Boltonin në konferencën për mediat me dy zyrtarë të tjerë të lartë të administratës?

Pse do të dilte menjëherë Bolton, dhe të kundërshtonte versionin e Trump, se si ndodhi shkarkimi? Pse askush tjetër në Shtëpinë e Bardhë, apo në këshillin e sigurisë kombëtare nuk e parashikoi që do të ndodhte diçka e tillë? Pavarësisht nëse e doni apo e urreni Trumpin, është e pamundur të arrihet në ndonjë përfundim tjetër, përveç asaj se Trump e shkarkoi Boltonin pas një zënke, ose pas një farë mërzitje me sjelljet prej “skifteri” të Boltonit.

Ky moment, është një tjetër dëshmi se si Trump i bën gjërat, dhe më pas përpiqet të bëjë një hap pas. Bolton kishte ndërtuar një karrierë në rradhët e neo-konservatorëve. Trump kishte garuar në vitin 2016 dhe fituar me një qasje gati-proteksioniste, duke këmbëngulur që Shtetet e Bashkuara, nuk duhet të kishin shkuar kurrë në luftë në Irak.

Dyshja Trump-Bolton nuk do të kishte funksionuar kurrë, veçanërisht duke pasur parasysh që Trump ka shumë pak interes për anëtarë të stafit, që nuk pajtohen me pikëpamjet e tij. Sipas një burimi të njohur me negociatat midis Trump dhe Bolton, para se ky i fundit të merrte postin e këshilltarit të sigurisë kombëtare, se “Bolton i premtoi Trumpit” se nuk do të fillonte asnjë luftë “nëse zgjidhej në detyrë”. E kush mund ta parashikonte këtë ndarje?

Kthehemi disi prapa në kohë, për të parë 3 burrat që kanë shërbyer si këshilltarë të sigurisë kombëtare të Trumpit, gjatë 3 viteve të para të presidencës së tij:Majkëll Flin, H.R.Mekmaster dhe Xhonson. Flin u zgjodh në atë post, pasi kishte qenë një mbështetës i hershëm dhe i zhurmshëm i fushatës së Trump në vitin 2016.

Mekmaster u soll nga brenda establishmentit të Partisë Republikane, që mendonte se gjërat sikur po dilnin nga binarët. Se përse u zgjodh Bolton, unë nuk e di saktësisht. Përpiquni të gjeni një lidhje mes këtyre emrave. Në fakt nuk ka një të tillë. Dhe unë dyshoj se cilido që të jetë pasardhës i Bolton, nuk do të ketë shumë të përbashkëta me këshilltarët e mëparshëm të sigurisë kombëtare.

Sepse kjo administratë, nuk ka “një plan madhështor”, siç i pëlqen ta thotë shpesh. Ai nuk ka asnjë model, asnjë orientim, asgjë. Është vetëm Trump dhe tekat e tij. Dhe kjo është një dreq mënyre për të drejtuar një qeveri./ TIRANA TODAY

Kthehu
WhatsApp Denonco ne TT