Një grup gazetarësh janë mbledhur sot në shenjë protestë para Prokurorisë së Përgjithshme.
Siç kishin paralajmëruar, protesta ka ardhur si shenjë reagimi ndaj rasteve të shumta të intimidimit të reporterëve ndërsa kryejnë detyrën. Rasti më i fundit është i ditës së premte ku rojet e sigurisë së Prokurores së Përgjithshme të Përkohshme Arta Marku, ushtruan dhunë fizike ndaj gazetarit Renaldo Salianji, gjatë kohës që po kryente detyrën e tij.
Gjatë një komunikimi për mediat, gazetarja Brikena Prifti u shpreh se gazetarët janë në pritje të një ndjese nga ana e Arta Markut për këtë akt.
“Kjo protestë është vetëm nga gazetarët e lirë, nuk kemi as lidhje partiake dhe asnjë qëllim për të sulmuar njerëz që janë të lidhur me politikën apo institucionet. Prej Arta Markut presim të kërkojë ndjesë për këtë akt. Kërkojmë të na lini të lirë për të kryer detyrën tonë”, është shprehur gazetarja Brikena Prifti.
