Dosja hetimore për pastrimin e parave nga Cosa Nostra-n, ka tronditur politikën shqiptare. Sipas përgjimeve, politika ka dhënë garanci për pastrimin e parave, ndërkohë që kjo tani është kthyer në objekt debati në Kuvend. Ishte deputeti demokrat Ervin Salianji, i cili tha se deputeti socialist Erion Braçe ka dalë në përgjimet e prokurorisë italiane, ku flitet për Rezart Taçin së bashku me ministren e Financave.
Salianji u shpreh se Braçe ka marrë me miliona euro nga tenderat, dhe shtiret si i shqetësuar. Në kundërpërgjigje, Braçe u shpreh se nuk e njeh aspak Rezart Taçin, teksa shtoi se ai vetë ka qenë një ndër personat e vetëm që ka denoncuar sistematikisht korrupsionin politik.
Gazetari Artan Hoxha në “Abc Live”, u shpreh se në faqen 40-41 të dosjes, tregohet një bisedë e bërë më 18 tetor mes financierit të Francesco Zummo-s dhe bashkëjetueses së tij. Petruzzella i thotë: “Plaku ka folur me Rezartin, dhe ai i ka thënë që do ta zgjidhë këtë histori..”.
Hoxha shpjegon se sasia e parave ka mbërritur në Shqipëri më 28 korrik, megjithatë ai shton se nuk ka parë në dosje elementë që të tregojnë përfshirje të zyrtarëve shqiptarë.
“Nëse ka garanci, për të bërë këtë operacion, është bërë para se të vinin paratë. Nuk kam parë në dosje elementë të përfshirë të zyrtarëve tanë. Besoj se për shkak të faktit që paratë janë të bllokuara, siçilianët janë vënë në alarm. Dhe Taçi u ka thënë që do kontaktojë me zv/kryeministrin dhe ministrin e Financave”.
Artan Hoxha u shpreh se nëse SPAK do të gjejë elementë të përfshirjes së zyrtarëve, kjo “do ta vuloste të gjithë situatën”.
