Gjatë një konference për mediat, kryeministri Albin Kurti është prononcuar për reagimin e presidentit të Serbisë, Aleksandar Vuçiç, sa i takon vendimit më fundit të Qeverisë së Kosovës për vendosjen e reciprocitetit me Serbinë për çështjen e targave. Kurti deklaroi se nuk e ka ndjekur plotësisht deklaratën e Vuçiçit, por ka parë inat dhe vrer nga ai.
“Nuk e kam ndjekur të plotë deklarimin e presidentit të Serbisë. Cilësimet për veprimet tona nuk janë shumë të drejta.
Vrejta që ka shumë inat, shumë vrer që nuk i kontribuon deeskalimit të situatës. Nuk e di se për çfarë masash të Serbisë ndaj Kosovës e ka fjalën, por besoj që Kosova dhe Serbia duhet të ndërtojnë marrëdhënie të mira fqinjësore, duke u bazuar ne interesat e përbashkëta si dhe në vlerat evropiane”, tha Kurti.
Ai më pas shprehu keqardhje për qytetarët, që detyrohen të pajisen me targa të përkohshme RKS. Vuçiç tha dje se Serbia kërkon tërheqjen e të gjitha trupave që po qëndrojnë në veri të Kosovës, si dhe një përgjigje urgjente nga BE-ja për situatën. Ndër të tjera ai shtoi se kishte marrë një propozim për zgjidhjen e situatës në pikat kufitare në Jarinje dhe Bërnjak, por e ka refuzuar, duke e quajtur poshtëruese për Serbinë.
