Kryeministri i Kosovës, Albin Kurti ka folur për mediat pas mbajtjes së Samitit të liderëve të Ballkanit në Tiranë.
Kurti u shpreh se Serbia duhet të njohë Kosovën, teksa shtoi se ky shtet ka penguar nismat rajonale. Sipas Kurtit, njohja nga Serbia do krijonte situatën që vendet të ecin më shpejt drejt Bashkimit Europian.
Ndër të tjera, kreu i qeverisë kosovare thekesoi se të gjitha vendet duhet të futen si si rajon i përbashkët në marrëdhënie me BE sa i takon ekonomisë dhe tregtisë.
Albin Kurti: “Isha edhe në një konferencë tjetër rajonale në Selanik. Janë shtuar nismat e ndryshme që bëjnë bashkë liderët e Ballkanit. Duhet theksuar që në fjalën time, konstatova se derisa 6 shtete të Ballkanit janë në BE, ajo nuk është ende e plotë. Kosova e ka situatën më të vështirë, pasi nuk ka as liberalizim të vizave. Jemi të vendosur për të zbatuar reformat e kërkuara.
Nismat rajonale ngecin se mungon njohja nga Serbia. Njohja nga Serbia do krijonte situatën që vendet të ecin më shpejt drejt BE-së. Nevojiten edhe vlerat e BE të vendosen në raportet mes shteteve, nuk mjafton vetëm tregu ekonomik.
Në fund dhashë një propozim si mund të ecim para, është modeli i marrëveshjes europiane ekonomike. Ne të hyjmë si rajon i përbashkët në marrëdhënie me BE sa i takon ekonomisë dhe tregtisë. Të kalohet nga CEFTA në EFTA EEA. Gjëja më e rëndësishme është që Shqipërisë, Malit të Zi e Maqedonisë së Veriut t’i bashkangjitet edhe Serbia në njohjen e Kosovës.”
