Monika Kryemadhi ka nisur një tur të LSI-së nga Shkodra, për të rekrutuar mbështetës për mitingun e presidentit Meta në 2 mars. “Unë do të jem aty, jo për Metën, por për kauzën”, i tha ajo shkodranëve. Kryemadhi i kërkoi shqiptarëve që të merrnin pjesë në protestën e 2 marsit të thirrur nga presidenti Meta, kundër mazhorancës, e cila sipas tij po kryen një grusht shteti përmes kapjes së Gjykatës Kushtetuese.
Por, para se të bënte këtë thirrje, Kryemadhi u kujdes që të kërkonte falje për gabimet e kryera më parë. “Do të kërkoj falje për të gjithë gabimet tona, nuk jemi hyjnorë ato nuk gabojmë. Do të rregullojmë gabimet tona, është hyjnore që të pranosh gabimet”.
Gjithashtu ajo është shprehur se do të jetë në bulevard si qytetare, për të mbrojtur të drejtat e të gjithëve. “Data 2 mars është shumë e rëndësishme për ne për të gjithë, besoj e mbani mend se të gjithë ambasadorët, mos u nxehni dhe mos u zini. Nëse ka ndonjë ambasador që bie dakord me falsifikimin e Etilda Gjonaj atëherë jo vetëm turp për ata, por mos ja pafshim më bojën kurrë. Nëse këta ambasadorë janë mashtruar, kjo është shumë e besueshme ku ambasadat këtu punojnë me qeverinë duhet të kuptojnë se rreziku që kanos sot Shqipërinë shumë shpejt do të trokasë në dyert e shtëpive të tyre, se të shtetit kanë hyrë. Sepse spaçatorët e Edi Ramës pasi kanë mbaruar punë me fëmijët e shqiptarëve, do të shkojnë te fëmijët e tyre, do të drejtohen në shkollat e evropianëve dhe më pas në vendet e tjera. Sot jemi kështjella e pamposhtur e trafikut të kokainës”, është shprehur ajo.
