Ish-ministri i Drejtësisë, Ylli Manjani, ka komentuar deklaratën e kryeministrit Rama i cili tha se çmimi i energjisë nuk do kthehet më siç ishte, dhe pasi kriza të ketë ikur. Manjani teksa analizon qëndrimin publik të Ramës, thotë se rritja e çmimit nuk ka lidhje me “krizën”, por qenka vetë kriza. Për rrjedhojë, “kriza globale” ka qenë një taktikë për të fshehur shumëçka.
Në konferencën e sotme për mediat, pas mbledhjes së jashtëzakonshme të qeverisë dhe një ditë para prezantimit të planit të posaçëm për krizën energjetike, Rama tha se çmimin në benzinatë nuk e vendos shteti, por e vendos tregu. Duke iu referuar ekspertëve, ai theksoi se kriza ekonomike mund të zgjasë deri në vitin e ardhshëm, madje shtoi se nuk parashikohet që këto çmime do të shkojnë sërish siç ishin.
Statusi
Pra çmimi i energjisë, i rritur nga kjo “kriza globale”, nuk do uleshka kur kriza të ketë ikur.
Dmth rritja e çmimit nuk paska lidhje me “krizën”, por qenka vetë kriza. Ja pra që “kriza globale” ishte loja!!!
Siç e parashikuam. Duhet lënë 3 ditë se i përgenjeshtron vetë ato që ka thënë.
Tani presim të na zbulojë përse kaskada e Drinit u tha si dhe, si thahen financat e OSHE dhe KESH veçanërisht në vitet zgjedhore… Po pas disa ditësh do t’i thotë edhe këto, ashtu si padashje…
Për momentin i duhet një emergjencë. Nuk di të qeverisë pa emergjencë ky njeri!
