I pranishëm në nënshkrimin e marrëveshjes mes prezencës së OSBE, KQZ dhe Prokurorisë së Përgjithshmë, ambasadori Bernd Borchardt nënvizoi ndër të tjera se “shitblerja e votës minon besimin e qytetarëve te zgjedhjet”.
Kreu i prezencës së OSBE ka apeluar ndaj palëve politike, që të bëjnë përpjekje dhe ti japin fund fenomenit të shitblerjes së votave.
Sa i përket situatës politike, Borchardt deklaroi se OSBE rekomandon dialog për reformën zgjedhore.
“Reforma zgjedhore kërkon 84 vota. Nuk e di nëse ata që janë futur në Parlament janë në favor të reformës, por votimi i tyre është i ligjshëm nga pikëpamja juridike. OSBE rekomandon dialog për reformën zgjedhore”.
Në lidhje me pjesëmarrjen e opozitës në zgjedhjet e 30 qershorit, ambasadori u shpreh: “Në dijeninë time nuk është marrë ende vendim nëse opozita nuk do të hyjë në zgjedhje, por sigurisht inkurajojmë hyrjen në zgjedhje”.
Për opozitën e re, Borchardt tha se anëtarët e Parlamentit në çdo vend të botës janë të lirë. dhe kanë të drejtë të zgjedhin nëse duan të jenë pjesë e Parlamentit apo jo.
