Në kuadër të bisedimeve për dialogun, kryeministri i Kosovës Avdullah Hoti dhe presidenti i Serbisë Aleksandër Vuçiç, sot kanë zhvilluar një takim virtual. “Kosova dhe Serbia janë dy shtete”, ishte fraza që ka nxehur presidentin serb, i cili ka reaguar ashpër.
Presidenti serb është nxehur gjatë diskutimit, pasi kryeministri i Kosovës, Avdullah Hoti, në mënyrë të përsëritur i është referuar Republikës së Kosovës si shtet.
Vuçiç në fjalën e tij i ka kërkuar kryeministrit të Kosovës që të mos e përdorë më shprehjen “Kosova dhe Serbia janë dy shtete”.
“Hoti theksoi disa herë: dy shtete-dy shtete, dy shtete-dy shtete në këtë takim, por edhe në takimet e tjera. I them të mos e përdorë këtë mijëra herë. Nëse do afrim mes nesh, mos e thuaj këtë gjithmonë. Ne e dimë çfarë mendon”, ka thënë Vuçiç.
Ndër të tjera Vuçiç, në Forumin e Sigurisë në Beograd, ka deklaruar se nuk ka dy shtete, ka një shtet që është anëtar i OKB-së në akordancë me Rezolutën 1244.
“Duhet ta respektojmë njëri-tjetrin. Kur flasim për zgjidhje kompromisi, nuk mund të flasim që Serbia ta njoh Kosovën dhe Kosova ta njohë Serbinë. Ju nuk njihni shtete. S’kemi nevojë për ketë. Kemi nevojë për kompromis”, është shprehur Vuçiç.
