Kreu i Urgjencës Kombëtare, Skënder Brataj deklaroi se të infektuarit me koronavirus kohët e fundit në vendin tonë, kanë shfaqur shenjat tipike të variantit indian të koronavirusit, Delta. Deklarata e Bratajt u bë ditën e sotme në një intervistë për A2CNN.
Sipas Bratajt, ky mutacion ngatërrohet me ftohjen, sidomos kur ajri është i kondicionuar, si dhe me dhimbje fyti e sekrecione nga hundët.
Brataj u shpreh se variant Delta ka një përhapje më të madhe se variantet e tjera, teksa shtoi se sipas studimeve, është 1 mijë herë më i përqendruar se sa varianti i Wuhanit dhe ai anglez, gjë që e bën më të rrezikshëm sa i përket përhapjes.
Skënder Brataj: “Shenjat kryesore ngatërrohen me ftohjen sidomos tani nga ajri i kondicionuar, me dhimbje fyti dhe sekrecione nga hundët. Por këto janë dhe shenjat tipike të variantit “Delta” që shoqërohen edhe nga temperature. Është parë që periudha e inkubacionit është shumë e shkurtër. Nga 6 ditë që ishte për variantin anglez ka zbritur në më pak se 4 ditë. Shpeshtësia e përhapjes është më e madhe. Karakteristike në studimet e fundit është fakti se ka një përqindje të lartë si virus, është mbi 1 mijë herë më i përqendruar se sa varianti i Wuhanit dhe ai anglez, gjë që e bën më të rrezikshëm sa i përket përhapjes. Kryesisht kap personat e pavaksinuar, por edhe ata që janë vaksinuar nuk janë përjashtuar nga infektimi”.
