Shefja e Epidemiologjisë në ISHP, Silva Bino, u bën thirrje qytetarëve që të tregojnë kujdes për veten dhe të afërmit e tyre, pasi Covid-19 ekziston dhe virulenca nuk ka ndryshuar. Me anë të një videoje, ajo ka rrëfyer eksperiencën e saj në përballjen me infeksionin, ku thotë se e ka kaluar në një formë të rëndë.
Të gjithë ata që nuk besojnë tek koronavirusi, ajo u ka kërkuar që të lexojnë faktet, e mbi të gjitha të dëgjojnë historitë njerëzore nga të cilat ka shumë. Kjo sëmundje nuk të lë të mbushesh dot me frymë, dhe pasojat më pas janë fatale.
“Covidi ekziston. Covidi paraqitet në disa forma, midis të cilave janë forma të lehta, mesatare, të rënda dhe tepër të rënda.
Virulenca siç thuhet shpesh herë, nuk ka ndryshuar. Pra shkalla e formave të rënda mbetet e njëjtë. Personalisht kalova një formë të rëndë, pra e provova vetë çdo të thotë të kalosh Covid në formë të rëndë.
Për të gjithë ata që nuk besojnë, duhet të jenë të kujdesshëm, të lexojnë faktet. Duhet të dëgjojnë historitë njerëzore, nga të cilat ka shumë.
Të cilat tregojnë se sa e rëndë është sëmundja, kur nuk mbushesh dot me frymë, kur nuk merr dot oksigjenin. Dhe duhet pikërisht për këtë arsye të jenë të kujdesshëm, të mbrojnë veten dhe të afërmit e tyre.
Pavarësisht moshës, pavarësisht kanë apo jo sëmundje shoqëruese. Shpeshherë Covidi nuk pyet”, shprehet Silva Bino.
