Kryeministri Rama ka mbledhur sot Komitetin Kombëtar të Sigurisë, lidhur me masat e marra deri më tani për parandalimin e Koronavirusit.
Gjatë fjalës së tij, Rama sqaroi edhe një herë se nuk ka asnjë të prekur nga koronavirusi në vend. Ai tha se nëse do të jetë e nevojshme ngritja e karantinës, atëherë ajo do të ngrihet në Shtëpinë e Pushimit të Ushtarakëve në Durrës.
Kreu i qeverisë ka dënuar edhe lajmet e rreme që janë shpërndarë këto kohë në lidhje me koronavirusin, të cilat sipas tij vetëm kanë ndihmuar në futjen në panik të qytetarëve.
“Deri tani nuk kemi asnjë rast të konfirmuar. Janë testuar në ISHP deri sot 17 raste të dyshuara që kanë rezultuar negative. Situata është ndjekur me vëmendje të vecantë nga Ministria e Shëndetësisë, që ka ngritur që në muajin e parë, task forcën për përgatitjen, parandalimin dhe kontrollin në sfidën e madhe, që është një sfidë që na takon ta përballojmë ne, sipas rekomandimeve të OBSH, duke ndërtuar një strategji me të gjithë hapat në funksion të parandalimit të infeksionit në vendin tonë.
Janë shpërndarë udhëzues sipas OBSH-së, janë trajnuar profesionistë të shëndetit, dhe vijojnë sipas planit. Janë dyfishuar ekipet në pikat kufitare. Janë kontrolluar 14 mijë udhëtarë. Në aeroportin Nënë Tereza, janë vendosur mjedise të caktuara.
Është për të ardhur keq që kudo bëhet politikë, kudo ka debat, askund tjetër nuk ndodh që individë të zëshëm me mandat politik, të bëjnë ato që kanë bërë gjatë këtyre ditëve, duke përhapur panik, qoftë sa i përket kushteve dhe impaktit të një zone të karantinuar. Askund në asnjë pikë të globit nuk ekziston që karantinat të ndërtohen nëpër male, pyje, larg zonave të banuara. kjo është një shpikje në vazhdën e ushqyerjes së infodemisë. Në rastin e parë që do të kemi nevojën e karantinës, kemi caktuar të ngrihet në Shtëpinë e Pushimit në Durrës, me OBSH është konstatuar përmbushja e kushteve, me garanci për të gjithë”, tha Rama.
