Përhapja e koronavirusit në shumë vende të botës po çon në mbylljen e shumë kompeticioneve të njohura të futbollit.
Pas mbylljes së kampionatit zvicerian edhe Seria A vendosi të ndërpresë ndeshjet e saj. Ndërkohë që edhe në shumë shtete të tjera është krijuar e njëjta situatë: ndeshje pa tifozë ose ndeshje të pezulluara.
Një skenar që po merr jetë ditët e fundit ka të bëjë me shtyrjen në kohë të kompeticioneve. Kështu, duke marrë parasysh versionin italian, nëse situata përmirësohet deri në 3 prill, atëherë kampionati do të shtyhet deri në mes të qershorit.
Më pas lojtarët do të bëjnë 20 ditë pushim dhe më pas do të impenjohen në finalet e Euro 2020, që duhet të nisë në gusht. Kjo do të sillte edhe shtyrjen e Ligës së Kombeve, që sipas kalendarit aktual duhet të nisë në shtator.
E gjitha kjo varet nga fakti se si do përballohet gjendja e krijuar nga koronavirusi.
