Kupa e Shqipërisë ka hyrë në një fazë interesante, duke qenë se kanë mbetur vetëm 8 skuadra dhe të gjitha janë nga Superiorja. Ditën e djeshme, është hedhur shorti i Kupës, aty ku skuadrat kanë njohur rivalët që do të kenë përballë në ndeshjet që do të luhen në datat 11 shkurt dhe 4 mars, për të zbuluar në këtë mënyrë emrat e 4 ekipeve që do të kalojnë në gjysmëfinale.
Nëse për skuadrat që duket se janë të konfirmuara si pretendentet kryesore të “Final 4”, Kupa është vetëm një trofe dhe objektiv i dytë, nuk mund të thuhet e njëjta gjë për të tjerat. Ekipet që mbeten jashtë “Final 4”, kanë mundësinë e vetme dhe në fakt një mundësi reale që vetëm me 5 ndeshje, të sigurojnë miliona euro duke qenë se fituesi i Kupës së Shqipërisë, kualifikohet automatikisht në turin e parë të Ligës së Konferencës. Kështu, skuadrat që praktikisht e shohin si të pamundur kualifikimin në katërshen më të mirë të sezonit, mund t’i kushtojnë një vëmendje më të veçantë Kupës, duke qenë një rrugë shumë e shkurtër për të siguruar pjesëmarrjen në Europë e ndoshta, edhe për të tentuar kalimin e tureve që do të sillte miliona euro për arkat e klubeve shqiptare.
FITUESIT E FINAL 4- Që nga viti i parë që Shqipëria ka sistemin me “Final 4”, fituesit e Kupës kanë qenë skuadra të kualifikuara në katërshen më të mirë. Kështu, Egnatia ishte skuadra e parë që arriti të fitonte Kupën e Shqipërisë e njëkohësisht arriti që të fitonte edhe titullin kampion. Diçka e tillë, bëri që në Kupat e Europës të shkonin katër skuadrat që ishin në “Final 4”, mes tyre Skënderbeu por duke qenë se këta të fundit janë të dënuar nga Europa, Tirana që renditej në vendin e pestë në klasifikim, mori vendin e “ujqërve”. Sezonin e shkuar, historia u përsërit me fituesin e Kupës, duke qneë se Dinamo arriti të fitonte në finale ndaj Egnatias. Këta të fundit, u shpallën kampionë të Shqipërisë ndërsa Dinamo fituese e Kupës dhe në Europë shkuan 4 vendet e para në klasifikim.
ÇFARË NDRYSHON KUPA- Nëse fituesi i Kupës këtë sezon do të jetë një skuadër që e mbyll sezonin jashtë “Final 4”, do ta bënte këtë fazë edhe më interesante. Arsyeja e kësaj është fakti se skuadra fituese do të zinte një vend dhe nga katërshja më e mirë, do të shkonin në Europë vetëm 3 skuadra dhe në këtë “mini turne”, do të kishte 2 luftëra, njëra për titull e tjetra për Europë. Mund të ndodhë që edhe skuadra që e mbyll sezonin në vendin e parë, të mbetet jashtë Europës nëse në “Final 4” përfundon e fundit dhe Kupën e fiton një skuadër tjetër që ka përfunduar kampionatin e rregullt në vendin e pestë ose më poshtë.
