Ministrja e Shëndetësisë Ogerta Manastirliu ishte e ftuar mbrëmjen e sotme në emisionin “Real Story” në “News24” prej ku foli ndër të tjera për koronavirusin dhe gjendjen aktuale në vend.
Në një kohë kur asnjë person nuk është diagnostikuar deri më tani me koronavirus në Shqipëri, Manastirliu theksoi se po merren masa për përballimin e çdo skenari të mundshëm.
Lidhur me largimin e mjekëve nga vendi ynë, ministrja deklaroi se ky është një fenomen që nuk ka prekur vetëm Shqipërinë, por edhe vendet e tjera të Evropës.
Në vijim, Manastirliu pohoi se qeveria po bën gati një paketë për rikthimin e mjekëve.
“Takimi jonë i fundit me ministrinë e Diasporës dhe me mjekët që kanë paraqitur interesat për bashkëpunim, që duan të vendosin kontakte dhe për të vlerësuar rikthimin në vend. Lëvizja e lirë e mjekëve nuk është një fenomen që ka prekur vetëm Shqipërinë, por vendet europiane.
Është një lëvizje e lirë e trurit për të gjetur mundësi më të madhe. Qeveria po përgatit një paketë atraktive për të rithithur trurin e mjekëve që janë larguar dhe në vite të mëparshme. Shqiptarë të kualifikuar kanë ikur gjithmonë. Po bëjmë gati një paketë për rikthimin e tyre dhe rritjen e tyre profesionale dhe angazhimin e tyre këtu. Ne nuk kemi luksin që të humbim asnjë mjek”, tha Manastirliu.
