Mediat serbe kanë reaguar mbi protestën e thirrur kundër vizitës së Aleksandër Vuçiç në Tiranë. “Novosti” shkruan se ish-kryeministri Sali Berisha ka bashkëpunuar me ish-kryeministrin e Kosovës, Ramush Haradinaj, për të organizuar këtë protestë.
Shkrimi i plotë
“Ekstremistët shqiptarë, me ndihmën e politikanëve nga Kosova, po përgatisin të hënën dhe të martën protesta kundër presidentit serb Aleksandar Vuçiç, i cili ato ditë do të jetë në Tiranë në kuadër të nismës “Ballkani i Hapur”, mëson “Novosti”.
Sipas burimeve tona, organizatorë të demonstratës janë Sait Dollapi, ish-sekretar organizativ i PD-së dhe Agron Kuliçaj e Sali Lushaj, njerëz të besimit më të madh të ish-presidentit dhe ish-kryeministrit Sali Berisha.
Bashkëbiseduesit tanë të mirëinformuar pohojnë se Berisha ka kontaktuar personalisht me Ramush Haradinajn për të siguruar praninë e së paku 100 personave nga Kosova në këtë protestë.
Prandaj Lushaj dhe Dollapi shkuan sot në krahinën jugore të Serbisë, për të organizuar ardhjen e ekstremistëve nesër dhe pasnesër në Tiranë dhe këtë operacion e ka përkrahur edhe kryeministri aktual i Institucioneve të Përkohshme në Prishtinë, Albin Kurti.
Pritet që hyrja të organizohet përmes Morinës, nga Mali i Zi dhe Maqedonia e Veriut, në mënyrë që policia të mos i kthejë. Kujtojmë se ekstremistët shqiptarë protestuan kundër presidentit Vuçiç edhe në vitin 2019, kur ai vizitoi Tiranën për të rënë dakord me Edi Ramën për nismën “Ballkani i Hapur”.
Burimi i lajmit: novosti.rs. Përshtatur nga Tirana Today
