Ministri i Brendshëm, Sandër Lleshaj, ka përgëzuar qytetarët për respektimin e izolimit në shtëpi. Ai njofton me anë të një statusi në Facebook se shumica e shqiptarëve po respektojnë rregullat e parandalimit të përhapjes së COVID-19, duke qëndruar vigjilent para rrezikut që na kanoset të gjithëve pa përjashtim.
Po kështu, ministri njofton se policia dhe organet e tjera shtetërore, janë të angazhuara të sigurojnë zbatimin e ligjit dhe të rregullave të jashtëzakonshme. Por kërkohet edhe bashkëpunimi i qytetarëve të ndërgjegjshëm.
Policia e Shtetit ka gjobitur 165 shtetas në të gjithë vendin, pasi nuk kanë respektuar oraret kufizuese të qarkullimit. Sot ka hyrë në fuqi urdhri i kryeministrit Edi Rama, për të lejuar qarkullimin e këmbësorëve vetëm në oraret 06:00-10:00 dhe 16:00-18:00.
Statusi
Shumica absolute e shqiptarëve po respekton jetën e vet dhe të të tjerëve, duke zbatuar rregullat e parandalimit të përhapjes së COVID-19.
Por fatkeqësisht ka edhe ndryshe. 165 persona janë gjobitur sot pas orës 10:00 nga Policia e Shtetit, për mos respektim të orarit të kufizimit të lëvizjes.
Koha është për përgjegjshmëri të lartë dhe jo për “trimëri” të marrë. Ata që nuk kanë frikë për jetën e tyre, duhet të paktën të kenë respekt për jetën e të tjerëve.
Duke qarkulluar në mjedise publike ne shtojmë rrezikun për veten, por dhe për të tjerët.
Policia dhe organet e tjera shtetërore janë të angazhuara të sigurojnë zbatimin e ligjit dhe të rregullave të jashtëzakonshme. Që kjo të ndodhë më mirë, kërkohet edhe bashkëpunimi i qytetarëve të ndërgjegjshëm.
Ju lutem raportoni në numrin 112, ose në aplikacionin “Komisariati Digjital” rastet e shkeljes së rregullave të vendosura për parandalimin e përhapjes së COVID-19.
Vetëm kështu do të mund t’ia dalim”.
