Palët politike janë përfshirë në debatin e rradhës për miratimin e kodit të ri zgjedhor.
Sekretari i Përgjithshëm i PD, Gazment Bardhi thotë se Shqipëria ka detyrimin që të bëjë zgjedhje me një ligj që është në përputhje me standartet ndërkombëtare dhe që është në përputhje me Kushtetutën.
Sipas tij, kryeministri Edi Rama për hallin e pushtetit të tij, është gati t’i shpallë luftë Shqipërisë dhe Bashkimit Europian.
Bardhi shprehet se Rama po tenton të marrë peng të ardhmen europiane të Shqipërisë dhe të hedhë në erë zgjedhjet e radhës.
Postimi i Bardhit në Facebook
Shqipëria ka detyrimin që të bëjë zgjedhje me një ligj që është në përputhje me standartet ndërkombëtare dhe, mbi të gjitha, që është në përputhje me Kushtetutën e Shqipërisë. Pasi pengoi marrjen e ekspertizës së ODIHR, Edi Rama nuk duhet t’i trembet ekspertizës së Komisionit të Venecias.
Këmbëngulja arrogante e Edi Ramës në injorimin e apelit të Komisionerit për Zgjerimin në BE z. Oliver Varhelyi nxjerr zbuluar Kryeministrin autokrat që, për hallin e pushtetit të tij, është gati t’i shpallë luftë Shqipërisë dhe Bashkimit Europian. Shqiptarët nuk do ta lejojnë këtë!
Reforma Zgjedhore dhe zgjedhjet demokratike janë kusht për nisjen e bisedimeve të anëtarësimit në BE. Duke mos dëgjuar këshillën për të pritur Opinionin e Komisionit të Venecias, Edi Rama po tenton të marrë peng të ardhmen europiane të Shqipërisë dhe të hedhë në erë zgjedhjet e radhës.
Me 15 vota pro, Komisioni i Ligjeve vendosi që dekreti i Presidentit Meta për Kodin e Ri Zgjedhor të kalojë sërish në Kuvend ditën e enjte.
Nga 17 anëtarë prezentë, 15 votuan kundër dekretit kurse vetëm 2 pro, Korab Lita dhe Adriatik Alimadhi.
