Zëdhënësja e Bashkimit Evropian, Maja Koçijançiç ka reaguar lidhur me protestat e mbajtura në fundjavë në Beograd.
Sipas saj, është e drejta e qytetarëve që të protestojnë, por “parlamenti është vendi ku duhet të zgjidhen të gjitha çështjet e hapura”.
“Parlamenti është vendi ku duhet të ketë hapësirë për diskutim, me qëllim që të gjenden zgjidhje të përbashkëta dhe të zgjidhen problemet e qytetarëve. Dialogu i strukturuar me shoqërinë civile është po ashtu i rëndësishëm. Protestat duhet të mbeten të qeta dhe brenda ligjit, ashtu siç kanë qenë para kësaj fundjave. Qetësia dhe përmbajtja janë të domosdoshme”, tha Koçijançiç për gazetarët në Bruksel.
Që prej datës 8 dhjetor, në Beograd janë mbajtur çdo të shtunë protesta antiqeveritare, ndërsa të shtunën e kaluar disa protestues kanë hyrë në ndërtesën e Radio-Televizionit të Serbisë në Beograd, duke kërkuar hapësirë në televizionin publik.
Ata janë nxjerrë jashtë nga xhandarmëria, ndërsa protesta vazhduan edhe të dielën, teksa u kërkua dorëheqja e Vuçiç dhe hapësira në televizionin publik.
