Vrasja e 8-vjeçarit Mateo Vasiu në Fier, duket se po merr një tjetër rrjedhë. Familjarët e të ndjerit kanë hije dyshimi se vrasja nuk është kryer vetëm nga ana e Klodian Çalamanit. Ata pretendojnë se vrasja makabre është kryer në bashkëpunim me një grua.
Nëna e djalit dhe dy të afërme të familjes, kanë dëshmuar ditën e djeshme në polici, se kanë dyshime për përfshirjen e një gruaje në ngjarjen e rëndë. Sipas të dhënave të siguruara, një gjë të tillë e ka mohuar vetë Çalamani, i cili ka pranuar me gjakftohtësi se e ka kryer ai krimin, dhe se mban përgjegjësi të plotë mbi këtë gjë.
Familjarët e 8-vjeçarit Mateo Vasiu po meren me mbledhjen e firmave të qytetarëve, që vrasësi Klodian Çalamani të dënohet me varje. Ata hartuan peticionin pas dhënies së masës së sigurisë “arrest në burg” nga Gjykata e Fierit për 38-vjeçarin Çalamani.
Klodian Çalamani vrau dhe groposi 8-vjeçarin Mateo Vasiu në fshatin Grecalli të Fierit, më 16 nëntor.
Mateo Vasiu 8 vjeç, u godit me lopatë paraditen e 16 nëntorit në fshatin Grecalli të Fierit nga 38-vjeçari Klodian Çalamani, i cili më pas e groposi në oborrin e shtëpisë së vetë. Dy familjet janë komshi me njëri-tjetrin. Arsyet e krimit të rëndë nuk dihen ende.
Sipas deklaratës së familjarëve, Klodian Çalamani e kishte dërguar 8-vjeçarin Mateo që t’i dërgonte bukë, dhe i kishte dhënë biçikletën. Kur u kthye, e goditi për vdekje me sende të forta.
