Kryetari i Partisë Demokratike, Lulzim Basha në takimin që zhvilloi sot në Fier me strukturat e PD-së në këtë qytet i cilësoi protestat e organizuara nga opozita “europiane”.
“Protestat tona janë europiane dhe për Shqipërinë si gjithë Europa. Edhe mediat ndërkombëtare, së fundmi, na u drejtuan si “protestuesit pro-europianë”, tha Basha, i cili shtoi se “meritë të jashtëzakonshme për këtë ka bashkimi i qytetarëve, që ka ngjallur shpresën për ndryshim”, deklaroi Basha.
Ndër të tjera, Basha u shpreh se PD duhet t’i dalë për zot vendit, në mënyrë që të shtoi besimin sipas tij, tek 85 përqindëshi i qytetarëve që refuzuan të votonin në zgjedhjet e 30 qershorit.
“Kjo nuk është një betejë për pushtet personal. Nuk jemi në betejë për karriget tona, por për të mbrojtur interesin publik, për ndryshimin rrënjësor të sistemit, që e keqja që solli Edi Rama, të mos përsëritet më kurrë”, tha Basha.
