Në Itali, vdekshmëria është e lartë nga koronavirusi, e ndërsa në Kinë situata paraqitet drejt përmirësimit. Presidenti kinez Xi Jinping, teksa vizitoi sot qytetin e Wuhan, epiqendër e shpërthimit të epidemisë nga koronavirusi, tha se Kina pothuajse e ka fituar ‘betejën’ me virusin vrastar.
Sot Kina ka regjistruar rekordin minimal të rasteve të reja të koronavirusit. Gjatë 24 orëve të fundit, ka patur vetëm 19 viktima nga 40 që ishin një ditë më parë.
Ndër rastet e reja, 17 kanë të bëjnë me qytetin Wuhan, epiqendrën e epidemisë. Ndërsa dy të tjerët të infektuar janë ata që kanë udhëtuar në Mbretërinë e Bashkuar dhe në Spanjë.
Rastet e “importuara” në Kinë deri më tani janë 69. Në kohën kur koronavirusi goditi Wuhanin në fund të dhjetorit të vitit 2019, Kina ndërtoi 14 spitale të improvizuara në kohë rekord, për të trajtuar pacientët e shumtë të infektuar.
Pas më shumë se 2 muajsh, situata po stabilizohet. Dy spitalet e fundit në provincën Hubei janë vendosur të mbyllen, sipas agjencisë shtetërore të lajmeve Xinhua.
Të 14 spitalet u ndërtuan posaçërisht për t’u marrë me shpërthimin e koronavirusit dhe kryesisht trajtoheshin pacientë me simptoma të buta.
Përgjatë janarit dhe shkurtit, zyrtarët lokalë të shëndetit shndërruan objektet publike, siç janë stadiumet sportive dhe sallat e ekspozitës në spitale.
