Mazhoranca ka vendosur që të votojë nismën e opozitës parlamentare për listat e hapura. Në një deklaratë për median, kreu i grupit parlamentar të PS, Taulant Balla, deklaroi se Partia Socialiste mbështet kërkesat e opozitës parlamentare për ndryshimet kushtetuese.
“Na rezulton se shqiptarët duan që të shprehin një votë, jo vetëm për kryetarin e partisë, por edhe një votë për njërin për kandidatët në listën e secilës prej partive që marrin pjesë në zgjedhje. Ne e mbështesim në parim nismën e deputetëve të opozitës parlamentare.
Ky është një hap i rëndësishëm për një demokratizim më të plotë të jetës politike në vend. PS-ja ka qenë refleksion i asaj që do shumica dhe në këtë këndvështrim, mbështesim një hapje të listave, që mund të garantojë garancitë e përfaqësimit të drejtë gjinor, që të mos kemi vetëm burra në parlament.
Procesi për hapjen e listave ecën në mënyrë të pavarur nga drafti i 5 qershorit. Në kodin zgjedhor është depozituar në 1 korrik, në 15 korrik komisioni i ligjeve do i diskutojë dhe nuk do të preket asnjë prej atyre. Janë dy procese që ecin në mënyrë të pavarur nga njëra tjera”, tha ai.
Ndërsa kryeministri Rama deklaroi se mbështesin hapjen e listave. Sipas tij, hapja e listave përkon me dëshirën e qytetarëve.
“Është një vendim që reflekton bindjen tani se hapja e listave përkon me dëshirën e një mase shumë të madhe të qytetarëve shqiptare që shkon shumë përtej një shumicë e një pakice qeverisëse. E siç e tha dhe Taulanti përtej asaj që do të ishte zgjidhja më e thjeshtë dhe në pamje të parë më komode për një parti të madhe, por edhe për mua personalisht për mua si kryetar i PS, që në këtë rast dua t’jua jap të gjithë jo me fjalë, por me faktin e hapjes së listave se asnjëherë s’ka qenë prioriteti e komoditeti im. Por prioriteti është që PS të reflektojë mbi shoqërinë e ambiciet e shoqërisë”, tha kryeministri.
