Në fjalimin e mbajtur në Kuvend, kryeministri Rama ka vendosur pikat mbi ‘i’, ndërsa tha se presidenti Meta ka dhunuar Kushtetutën, dhe na ka turpëruar me SHBA-në. Pas përfundimit të vizitës së tij dy ditore në Bullgari dhe në Rumani, është kthyer në Kuvend për të votuar shkarkimin e Presidentit të Republikës, Ilir Meta. Ai deklaroi se Meta ka humbur të gjitha shanset, për t’u kthyer në binarët ligjorë.
“Ilir Meta ka tradhtuar misionin e Presidentit të Republikës së Shqipërisë. Ilir Meta ka poshtëruar Kushtetutën e Republikës së Shqipërisë. Ilir Meta ka shembur institucionin e garantit të unitetit kombëtar.
Ilir Meta ka dhunuar kufirin jetik të ndarjes së pushteteve në demokracinë tonë parlamentare. Ilir Meta ka turpëruar Shqipërinë dhe popullin shqiptar në marrëdhënien krejt speciale me SHBA.
Ilir Meta ka shkarravitur fytyrën e shtetit shqiptar në marrëdhënie me përfaqësitë e bashkësisë demokratike ndërkombëtare në Shqipëri. Ilir Meta i ka humbur plotësisht dhe përfundimisht të gjitha shanset që i janë dhënë bujarisht në mënyrë të përsëritur, për t’u kthyer në binarët e arsyes morale dhe ligjore.
Shqipëria nuk mund të mbajë më në kurriz Ilir Metën, duke u bërë gazi i botës në sy të miqve të saj dhe vetë qytetarëve të saj. Prandaj ky parlament duhet të ushtrojë pa ngurrim vullnetin e më shumë se 90% të popullit shqiptar për ta shkarkuar Ilir Metën nga detyra.
Keqardhje për mikun tonë të dikurshëm Ilir, por Meta i sotëm nuk mund të ketë kurrsesi më statusin e lartë që i ka dhënë parlamenti. Ilir Meta ka mbaruar punë me rolin që mori nga parlamenti dhe fjalët për të si president kanë mbaruar. Tani të flasë parlamenti me votë”, tha Rama.
Kuvendi është mbledhur sot në seancë plenare, për të shqyrtuar projektvendimin për shkarkimin nga detyra të Presidentit të Republikës, për shkak të shkeljeve të rënda. Kuvendi po shqyrton projektvendimin “Për miratimin e raportit përfundimtar të Komisionit Hetimor të Kuvendit “Për hetimin e shkeljeve të rënda kushtetuese nga Presidenti i Republikës së Shqipërisë” , si dhe Projektvendimin “Për shkarkimin nga detyra të Presidentit të Republikës për shkak të shkeljeve të rënda të Kushtetutës”.
