Kryeministri Edi Rama ka debatuar me një nga banorët që i është dëmtuar banesa pas tërmetit të 26 nëntorit, gjatë vizitës së tij në kompleksin “Fafa”.
Teksa po bisedonte me banorët e prekur që janë strehuar për momentin në këtë kompleks, një qytetare ndërhyri duke iu drejtuar kreut të qeverisë me fjalët: “Ngelëm mes katër rrugëve. Ja tani jemi në hotel deri në datën 1, pastaj do mbesim mes rrugëve”.
Kryeministri iu përgjigj duke i kërkuar që të bëjë durim, teksa shtoi se nuk ka një shkop magjik që të rregullojë gjithçka për dy javë.
“Qeveria nuk të la në rrugë. E para falendero Zotin që nuk të mori dhe të la në këtë botë. Je mirë në ombrellë. Jemi pak më shumë se dy javë kur ndodhi dhe unë nuk kam shkop magjik t’i ndërtojë shtyllat të gjitha. Kështu që do presësh, nuk do paguash asgjë. Nga 1 janari do ikësh nga këtu, janë dhënë lekët dhe do shkoni në shtëpi në qira”, tha Rama.
