Ambasadori i BE-së në Shqipëri, Luigi Soreca, nga qyteti i Shkodrës ka thënë se protestat janë të mirëpritura, por nuk duhet të degradojnë në dhunë. Sipas Soreca-s, është për të ardhur keq që opozita po mban qëndrim, pasi në këtë mënyrë po minohet proçesi i integrimit në BE.
“E drejta për të protestuar është për të gjithë, dhe ne mbështesim të gjithë ata që protestojnë, por kjo gjë duhet të jetë e paqme dhe pa nxitje për dhunë. Nxitja për dhunë është e pafalshme, dhe ne presim që protestat në vijim te jenë pa nxitje dhune. Situata është e paprecedent, kemi folur me te dyja palët. Jemi takuar me qeverinë si dhe opozitën.
Opozita po mban qëndrim pa u kthyer pas, dhe kjo është për të ardhur keq. Ja kemi thënë disa herë ketë gjë, por pa sukses. Kjo ndikon në integrimin e Shqipërisë. Ne kemi kërkuar dialog, dhe jemi te paanshëm. Ne i kemi kërkuar qeverisë që të dialogojmë. I bëjmë thirrje të gjithë politikanëve të Shqipërisë që të mbajnë anën e qytetarëve.
BE mbështet interesat e qytetarëve të Shqipërisë. Situata në vend minon ketë dëshirë të 93 % të qytetarëve shqiptarë për integrim, dhe është anëtarësimi në BE qëllimi jonë ndaj Shqipërisë.
Në rast mos zgjidhje të këtij ngërçi, integrimi i Shqipërisë është në rrezik”, deklaroi Soreca.
Gjithashtu, ai fton të gjitha institucionet të luajnë rolin e tyre në demokraci, të kujdesen për interesat e banorëve, si dhe u bën thirrje palëve të marrin pjesë në zgjedhjet vendore, si e vetmja mënyrë demokratike.
