I njohur si politikani “kaubojs”, Eduart Ndocaj, i ka cilësuar si dy fëmijë të llastuar kryetarin e PD-së, Lulzim Basha dhe kryeministrin Rama, duke iu referuar dështimit të gjetjes së gjuhës së përbashkët. Në një intervistë të dhënë për ‘Fax News’, ai tha se dy liderët thjesht po luajnë teatër, dhe se nuk u intereson fati i vendit, që është mbërthyer nga një ngërç. Referuar zgjedhjeve në 30 qershor, ai u shpreh se do të ketë vetëm votime.
“Këta luajnë teatër, janë dy fëmijë të llastuar, fëmijë blloku të rritur në komunizëm. Dua të them që mes tyre ka pasur gjithmonë marrëveshje në momentin kur kjo qeveri ka dalë jashtë funksionit.
Nuk munden dy individë të tillë që të bëjnë marrëveshje për fatet e kombit. Unë mendoj se zgjedhjet, do të ketë vetëm votime dhe jo zgjedhje. Ata duhet të jenë kundër kundër kësaj Rilindje të rrezikshme”.
Kandidati për Bashkinë e Lezhës ka vijuar më tej për aksionin opozitar. Ai e cilësoi vendin tonë si një katund në konceptin europian.
“Unë aksionin e kam mbështetur gjithmonë, por jo protestës që të heqim Ramën dhe të vendosim Bashën. Këta e kanë shkatërruar njëri pas tjetrin. Shqipëria ka disa parti që u është zënë fryma. Shqipëria është një katund në konceptin europian.
Është e rrezikshme që po e mbajnë peng dy parti të mëdha demokracinë e vendit. Ajo është e vetme, sepse shqiptarët nuk i shkojnë më mbrapa. Unë jetoj në një vend siç është Italia, ku qytetarët protestojnë në çdo protestë. Ky zotëria nuk është i zoti të bind as 5 % në Tiranë dhe i mbledh qytetarët nga rrethet në Tiranë. Nga demokratët kanë kërcënime të gjithë punonjësit e Bashkive. Qytetarët nuk besojnë më, sepse udhëheqësit e kësaj proteste janë të inkriminuar, për vjedhje floriri, banke, rastin e Gërdecit, vrasja e 21 Janarit dhe shume e shumë veprime të tjera anti kushtetuese”.
