Kryetarja e LSI-së, Monika Kryemadhi ka kritikuar mënyrën se si qeveria e ka menaxhuar krizën e krijuar nga përhapja e koronavirusit.
E ftuar në emisionin “Open” në Top Channel, Kryemadhi tha se qeveria ka gënjyer në lidhje me shifrat e publikuara për COVID-19.
Sipas saj, qeveria nuk ka treguar shifrën e saktë të personave që kanë humbur jetën nga koronavirusi në Shqipëri. Kryemadhi shton se koronavirusi ka shkaktuar viktima në vend edhe gjatë muajve janar dhe shkurt.
“Nuk ka një menaxhim të mirë nga qeveria. Shifrat nuk tregojnë asgjë. Qeveria ka mashtruar ka gënjyer me shifrat. Qeveria ka gënjyer me shifrat e të vdekurve nga Covid-19. Masat nuk parandaluan asgjë. Pse nuk rri në rrugë virusi gjatë orës 5 deri në 5 e gjysmë pasdite. Qeveria bën propagandë dhe nuk kërkon falje duke thënë që ky virus na zuri të papërgatitur dhe nuk arritëm ta menaxhojmë këtë situatë. Qeveria nuk ka treguar sa kanë vdekur në janar dhe shkurt”, tha ajo.
