Zv.ministrja e Shëndetësisë, Mira Rakacolli ka folur në lidhje me arsyen se pse në Shqipëri, nuk janë bërë testime masive për koronavirusin.
Në një lidhje të drejtpërdrejtë me emisionin “Real Story”, Rakacolli tha se kryerja e testimeve masive nuk është politikë e mirë konservative dhe se ekspertët nuk e këshillojnë këtë gjë.
“Mua nuk më duket politikë konservative dhe nuk është mirë bërja e shumë tamponave. Pasi qëllimi në vetvete është gjetja e rastit dhe izolimi i atij që ka koronavirusin. Kjo duket shumë mirë tek shifrat e çdo vendi. Nëse futen prsh 200 veta në testime, mund të dalin vetëm 10 përqind me virus. Por me hapjen do të kemi të fuqizuar sistemin e survejancës. Do fuqizojmë survejancën e në varësi të saj do të shtohen testet. Siç e kemi thënë është epidemi me shumë ta panjohura”, tha ajo.
Më tej, Rakacolli sqaroi se janë bërë testime imunologjike dhe se në mes të javës do të ketë një përgjigje për to. Megjithatë, ministrja sqaroi se siguria e këtyre testimeve nuk është 100%.
“Grupi i virologëve po shikon edhe testin imunologjik që është bërë. Është proces që po bëhet vazhdimisht dhe brenda javës do të kemi rezultate konkrete. Testet imunologjike kanë ardhur me certifikatë sigurie por siguria e tyre nuk është 100 përqind. Po bëhet eksperienca që bëhet kudo në botë, edhe në Itali, vendin që ju po citoni. Në mes të javës do kemi numrin total të personave që iu është bërë testi, do kenë edhe ata informacionin në dorë edhe publiku do të informohet”, shtoi ajo.
