Çdo ditë evidentohen shqiptarë të prekur nga kanceri. Sipas mjekëve, shifrat janë alarmante, ku rastet e reja vijnë në rritje progresive çdo vit. Edhe pse sëmundja e kancerit ka një rritje globale, në vendin tonë ka marrë përhapje të gjerë vitet e fundit. Sipas Dr.Orges Spahiu, shef i radiologjisë në QSUT; para viteve ’90 kishte më pak shqiptarë të sëmurë me kancer.
“Para viteve ’90 ka qenë një popullsi relativisht e re në moshë. Aktualisht kemi një rritje të popullsisë, ku vihen re faktorë të riskut nga më të ndryshmit, sa i takon kancerit. Ato janë faktorët ambiental, gjenetik. Pasi kanceri është i trashëgueshëm. Stili i jetës, ushqimet që konsumojmë janë po ashtu ndikuese. Duhet të ndiqet një dietë e caktuar dhe të mos abuzohet me ushqimet. Veç këtyre është edhe shtimi i një popullate të pakontrolluar.”
Doktor Spahiu shpjegon për Tirana Today se më të rrezikuar nga sëmundjet e kancerit janë femrat.
“Nga kancerit më të përhapur janë ai i mushkërive, më pas ai i gjirit dhe traktit gastrointestinal. Si edhe kancerit gjinekologjikë. Vëmendja e grave të jetë shumë e madhe ndaj ndryshimeve që ndodhin në trupin e tyre. Në disa raste kur kemi shenja që nuk duhen neglizhuar, siç janë prani e një formacioni në gji, kur kanë rrjedhje nga gjiri, një inflamacion apo futje të thithit brenda. Atëherë këto gra apo vajza duhet të drejtohen menjëherë tek mjeku i tyre.”
Edhe pse moshat e mëdha janë më të rrezikuara të preken nga kanceri, Dr.Spahiu thekson se në QSUT janë duke u trajtuar edhe fëmijë. Të cilët i nënshtrohen radioterapisë dhe kimioterapisë.
“Ka dhe minoren të prekur nga kanceri. Ka mosha pediatrike të cilat ne i trajtojmë bashkë me ekipin e pediatrisë onkologjike. Jemi duke trajtuar mosha të tilla edhe me radioterapi, të cilën këta fëmijë nuk e merrnin më parë. Një fëmijë kryesisht preket nga kanceri në mënyrë gjenetike, pra i janë trashëguar nga prindërit.
Me radioterapinë sot trajtohen rreth 90% e pacientëve me kancer dhe janë rreth 1400 pacientë në vit të cilët bëjnë radiografinë.”
Edhe pse sipas Organizatave Botërore të Shëndetësisë numri i të sëmurëve me kancer do vazhdojë të rritet, sipas mjekëve ato janë të shërueshme nëse kapen në kohë.
“Pritet një numër në rritje i të sëmurëve me kancer, por ndërkohë paralelisht shihet një rritje e shkencës dhe teknologjisë. Këto të fundit bëjnë të mundur që kjo sëmundje të jetë e kurueshme. Nëse kapet herët në fazat e para, sëmundja e kancerit është e kurueshme.” TIRANA TODAY
