Gjyqtarja Mimoza Margjeka ka akuzuar SPAK, se e kanë goditur politikisht për procesin e 30 qershorit. Ajo ka mbërritur mëngjesin e sotëm në gjykatë, për të qenë e pranishme gjatë seancës së saj për rivlerësimin e masës së sigurisë, e cila po mbahet në GJKKO.
”Do kërkoj shfuqizimin e masës, dosja është përrallë, është thashethem. Nuk di se çfarë të them. Unë do kërkoj foninë jashtë, gazetarët duhet të futen. Meqë tre ditë u trumbetua që gjyqtarja ka marrë 6 mijë euro, unë dua që gazetarët të jenë në sallë.
Kam 30 vite në gjyqësor, kam 4 diploma. Ju e dini shumë mirë që unë jam gjyqtarja e vetme që kam bërë nul procesin e 30 Qershorit. Gojën nuk ma ndalon asnjë njeri, dosjen nuk e nxjerr dot, nxirreni me autopalant si në kohën e Enverit, ne nuk jemi njerëz nga rruga”, tha ajo.
Margjeka është dënuar me “arrest shtëpie” nga GJKKO, ndërsa i shoqi i saj Arben Cara, është dënuar me “Arrest me burg”, për marrjen e 6 mijë euro për të liruar një të dënuar. Ata u akuzuan për korrupsion, që përmes ryshfetit të ndryshonin masën e sigurisë për Orion Balin nga “arrest me burg” në “garanci pasurore”.
Ka qenë telefonata e vëllai të Orionit, Nejton Bali me të ëmën e tij për të siguruar paratë që të lironte të vëllanë, që ka zbardhur të gjithë skemën e korrupsionit.
Avokatin Skënder Demiraj që mbronte Orion Balin përmes njohjeve të tij, ka ndërhyrë që përmes ryshfetit ta nxirrte atë nga burgu, duke i kërkuar 6 mijë euro. Nga skema e korrupsion GJKKO ka lënë në arrest me burg bashkëshortin e Margjekës, Arben Cara dhe dy sekserët Nejton Bali dhe Klaudio Zhilla. Ndërsa avokati dhe ish gjyqtarja u lanë në “arrest shtëpie”.
Kujtojmë këtu se gjyqtarja Mimoza Margjeka rrëzoi kërkesën e Valbona Sakos, për të marrë mandatin e kryebashkiakes së Durrësit, duke i argumentuar si nul zgjedhjet e 30 qershorit për Bashkinë e Durrësit.
