Këngëtarja e mirënjohur për publikun shqiptar Jonida Maliqi, ka publikuar pak ditë më parë klipin e këngës që do të na përfaqësojë në Eurovision.
Ajo ka publikuar gjatë ditës së sotme një postim në llogarinë e saj në Instagram, ku ka thënë se kënga “Kthehu Tokës” është shumë domethënëse për të, duke e ndjerë në çdo notë, për shkak se e ka provuar vetë të mos i ketë pjesëtarët e familjes afër, por në emigrim.
“Emigracioni nuk ka vetëm ngjyrat e vendit tim. Sot ai është një problem botëror. Unë e kam provuar në lëkurën time çdo të thotë të mos kesh pjesëtarët e familjes nën të njëjtën shtëpi, shtet. Thirrja ime është thirrje shpirti, e të gjithëve, për të qenë bashkë, të lumtur, të rrethuar nga dashuria! Shumë prej jush më kanë shkruajtur dhe e kanë ndjerë këtë këngë në çdo notë, disa të tjerë kanë kuptuar dhimbjen edhe nga xhirimet e videoklipit. Jam e lumtur që e doni ‘Ktheju tokës’ ashtu si unë”, shkruan këngëtarja.
Jonida Maliqi do të përfaqësojë Shqipërinë në këtë edicion të Eurovision, e pritet të ngjitet në skenë në muajin maj të këtij viti për natën gjysmë-finale.
