Ka nisur protesta e paralajmëruar për vrasjen e 25-vjeçarit, Klodian Rasha nga një efekt policie.
Protesta po zhvillohet para Ministrisë së Brendshme ku një grumbull i madh personash po tubohen me pankarta dhe thirrje kundër ministrit Sandër Lleshaj dhe Kryeministrit Rama.
Ata kërkojnë të japë dorëheqjen Ministrit të Brendshëm, Sandër Lleshaj, si dhe zbardhjen e së vërtetës.
“Jep dorëheqjen, turp, poshtë komunizmi” – thërrasin ata. Po ashtu, protestuesit kanë ndezur qirinj te shkallët e ministrisë në nderim të Klodianit.
Të tjerë shprehen se kanë frikë edhe për jetën e tyre dhe kërkojnë drejtësi për vrasjen e 25-vjeçarit.
Klodian Rasha, 25-vjeç është ekzekutuar me dy plumba këtë të martë, 8 dhjetor, nga një efektiv policie. Ngjarja ka ndodhur në zonën e Laprakës në kryeqytet, pasi i riu kishte dalë orët e para të mëngjesit jashtë banesës së tij, duke thyer orën policore.
Policia shprehet se Rasha ka kërcënuar efektivin e policisë, ndaj ai ka qëlluar në kushtet e vetëmbrojtjes dhe në errësirë. Por, ndryshe thonë familjarët dhe fqinjët të cilët shprehen se rruga është me ndriçim dhe i riu nuk mbante asnjëherë armë me vete.
