Kryeministri Edi Rama ka folur në seancën e sotme plenare në lidhje me rekomandimin e Komisionit Europian për hapjen e negociatave të vendit në Bashkimin Evropian.
Gjatë fjalës së tij, Rama deklaroi i bindur se zgjedhjet vendore te 30 qershorit nuk do të shtyhen, pasi sipas tij zgjedhjet i përkasin popullit, dhe jo partive politike. Megjithatë, shfaqet i vendosur të stimulojë një proces dialogu me opozitën.
“Ne mbetemi të vendosur të stimulojmë një proces dialogu me opozitën, por nuk kemi asnjë gatishmëri për të negociuar kushtetutën për një ligj themelor. Zgjedhjet i përkasin popullit sovran, dhe jo partive. Asnjëherë nuk do të negociojmë legjitimitetin dhe detyrimin për vazhdimësinë e këtij Parlamenti”, tha Rama.
Ndër të tjera, kryeministri duke iu drejtuar opozitës jo parlamentare, u shpreh se është e papranueshme dhe jashtë çdo logjike që “të lësh popullin pa zgjedhje”, teksa shtoi se: “Kundërshtarin nuk e zgjedh, e përballon. Brenda kësaj salle ne trajtohemi si kundërshtar, ndërsa jashtë kësaj salle na duhet të përballemi me një forcë që na trajtojnë si armiq”.
