Kryeministri Edi Rama së bashku me kryebashkiakun e Tiranës, Erion Veliaj kanë vizituar mbrëmjen e 31 dhjetorit disa nga familjet e mbetura pa shtëpi nga tërmeti i 26 nëntorit.
Dy zyrtarët takuan fillimisht familjen e Estref Shkallës, ku uruan familjarët për Vitin e Ri dhe iu premtuan se rindërtimi i shtëpisë së tyre do të bëhet në kohë rekord.
“Me siguri që do t’i rregullojmë të gjithë brenda vitit tjetër, ky është qëllimi. Kush është në çadër është prioriteti i parë, pastaj ata me qira. Ne kemi bërë një pjesë të madhe të planeve tani do të fillojmë. Shtëpinë tënde do ta bëjmë shpejt shumë, se shkova e pash, edhe themelet ishin bërë.
Nga marsi shtëpia do të jetë gati, por derisa të përfundojë shtëpia do të kalojnë në një shtëpi provizore.
Shtëpitë do të bëhen shpejt se do të bëhen me materiale të forta parafabrikate, dhe ato bëhen më shpejt, nuk kanë taksirate temperature, llaçi, janë ekologjike, antisizmike, edhe mobilimin bazë do jua bëjmë ne”, tha Rama.
Më pas Rama ka vizituar edhe disa familje të tjera, të cilat janë detyruar ta festojnë Vitin e Ri në çadra si pasojë e tërmetit të 26 nëntorit.
