Italia ka shënuar sot një ulje të lehtë të numrit të viktimave në bilancin ditor.
Sipas mediave vendase, në 24 orët e fundit në Itali kanë humbur jetën 420 persona nga COVID-19, 44 viktima më pak se ditën e djeshme.
Ndërkohë vihet re një rritje në numrin e rasteve të reja. Sot janë raportuar 3,021 persona të infektuar, ndërsa dje u regjistruan vetëm 2,646 raste të reja.
Që nga shpërthimi i koronavirusit, vendi fqinj numëron rreth 193 mijë raste infektimi dhe 25,969 viktima.
Më shumë se 60 mijë persona janë shëruar në Itali, ndërsa numri i rasteve ende aktive është 106,527. Në spital janë të shtruar 22 mijë pacientë nga të cilët 2 mijë në terapi intensive. Por numri i këtyre të fundit është në rënie.
Italia renditet e dyta në botë për numrin më të madh të viktimave nga COVID-19, ndërsa renditet e treta për numrin më të madh të rasteve, pas Spanjës dhe SHBA-ve.
Bilanci i Italisë për sot është i dyti më i rëndi në Evropë, pas Mbretërisë së Bashkuar, e cila në 24 orët e fundit regjistroi 768 viktima dhe mbi 5 mijë raste të reja.
Më shumë se 2,7 milionë njerëz nga e gjithë bota janë prekur nga koronavirusi, ndërsa mbi 194 mijë persona kanë humbur jetën.
