Një tjetër vend i shtohet listës së zezë nga koronavirusi vdekjeprurës. Teksa një ditë më parë u raportuan për 16 raste, por për aspak panik në Itali, sot është shënuar viktima e parë. Mediat raportojnë se ka humbur jetën 78-vjeçari Adriano Trevisan.
Për këtë ngjarje, kryeministri Giuseppe Conte ka zhvilluar një mbledhje të jashtëzakonshme me Mbrojtjen Civile, në të cilin mori pjesë edhe Ministri i Shëndetit, Roberto Speranza.
Gjatë mbledhjes, Conte ka thënë se janë marrë të gjitha masat, për të përballuar një emergjencë të tillë. “Ne kemi marrë të gjitha masat dhe jemi në dispozicion për të vijuar më tej nëse është e nevojshme”.
Ndërsa ministri Speranza ka shprehur bindjen se do e përballojnë këtë sfidë të vështirë. “Ne jemi të bindur që shërbimi kombëtar i shëndetësisë mund ta përballojë këtë sfidë. Ne kemi bërë një punë shqyrtuese shumë të kujdesshme, për të zgjedhur një nga një kontaktet e ngushta të këtyre njerëzve, dhe po i verifikojmë ato një nga një. Mendojmë se kjo është mënyra më efektive për të bllokuar përhapjen e virusit. Kushdo që ka hyrë në kontakt me njerëz që kanë testuar pozitivisht për virusin, duhet të hyjnë në karantinë. Ndërsa personat që jetojnë në fshatra ku janë raportuar raste të koronavirusit, duhet të qëndrojnë në izolim në shtëpi”.
