Qeveria italiane ka miratuar së fundmi një dekret të ri lidhur me kategoritë që lejohen të udhëtojnë drejt Italisë, ku përcaktohen edhe disa rregulla të reja.
Sipas këtij dekreti, lejohen që të udhëtojnë drejt shtetit fqinj, edhe ata persona të cilët provojnë se kanë marrëdhënie me personin ku do të qëndrojnë.
Më parë lejoheshin të hynin vetëm shtetasit që kishin nevoja pune, për çështje urgjence, shëndetësore, studimi apo kthimi në shtëpitë dhe vendbanimet e tyre.
Me rregullat e mëparshme nuk lejohej që të bashkoheshin çiftet të cilët mund të ishin të ndarë në shtete të ndryshme. Mirëpo me dekretin e ri, lejohet hyrja në Itali, për të mbërritur në vendbanimin, shtëpinë dhe vendbanimin e një personi, edhe nëse nuk bashkëjeton, me të cilin ekziston një marrëdhënie emocionale.
Gjithashtu në dekretin e ri është bërë e detyrueshme mbajtja e maskës në vende të hapura, ku nuk mund të ruhet distanca. Ndërsa, limiti i transportit publik përcaktohet në masën 80% të kapacitetit.
Bërja e tamponit mbetet e detyrueshme për ata shtetas që kthehen nga 16 shtete të cilësuara si rrezik transmetimi të koronavirusit.
Mediat italiane raportojnë se ka mbetur ende në fuqi rregulli për të mbajtur mbyllur diskotekat dhe stadiumet.
Ky dekret ka hyrë në fuqi më datë 7 shtator dhe do të mbetet në fuqi deri në fund të muajit shtator.
